પ્રેમમાં ખેંચાણ છે ...

પ્રેમમાં ખેંચાણ છે આવી ગઈ શ્રદ્ધા મને

એ હવે કહેવાને આવે છે કે ભૂલી જા મને

કંઈક ખામી આપણા આ પ્રેમના બંધનમાં છે

છુટવા માટે હજી દેખાય છે રસ્તા મને

હું તને જોતો તો દુનિયાને પછી જોતે નહીં

તું મને જોતે તો જોતી થઈ જતે દુનિયા મને

થાય ટીકા આપની એ પણ મને ગમતું નથી

હો પ્રશંસા આપની તો થાય છે ઈર્ષા મને

હાથમાં આવી ગયું તું એમનું આખું જીવન

હું તો ગાફિલ નહીં દેખાયા એ મોકા મને

આ સતત અવગણના એની મહેરબાની છે ‘મરીઝ’

ધીમે ધીમે એ કરી દેવાના બેપરવા મને